ជំពូក៧
សញ្ញាសម្គាល់ដ៏ចាំបាច់នៃពួកជំនុំដែលមានសុខភាពល្អ៖
ការយល់ពីដំណឹងល្អតាមព្រះគម្ពីរ
ពួកជំនុំរបស់យើងត្រូវតែមានភាពរឹងមាំទៅនឹងផ្នែកដ៏ពិសេសមួយនៃទេវវិទ្យាតាមព្រះគម្ពីរ ហើយផ្នែកដ៏ពិសេសនោះគឺ ការយល់ពីដំណឹងល្អនៃព្រះយេស៊ូវគ្រីស្ទតាមព្រះគម្ពីរទាំងស្រុង។ ដំណឹងល្អគឺជាចំណុចស្នូលនៃជំនឿគ្រីស្ទបរិស័ទ ហេតុដូច្នេះហើយ វាគួរតែជាចំណុចស្នូលនៃពួកជំនុំរបស់យើងដែរ។
ពួកជំនុំដែលមានសុខភាពល្អ គឺជាពួកជំនុំដែលមានជំនឿដូចគ្នាលើដំណឹងល្អដ៏អស្ចារ្យនៃសេចក្តីសង្គ្រោះតាមរយៈព្រះយេស៊ូវគ្រីស្ទ ទោះបើសមាជិកពួកជំនុំជាកូនក្មេង មនុស្សចាស់ ពេញវ័យឬមិនពេញវ័យខាងឯវិញ្ញាណក្ដី។ គ្រប់ទាំងបទគម្ពីរនៅក្នុងព្រះគម្ពីរចង្អុលបង្ហាញពីដំណឹងល្អ ឬពីផ្នែកខ្លះនៃដំណឹងល្អ។ ដូច្នេះហើយ ពួកជំនុំប្រជុំគ្នាពីមួយសប្ដាហ៍ទៅមួយសប្ដាហ៍ ដើម្បីនឹងស្ដាប់ដំណឹងល្អម្តងហើយម្តងទៀត។ នៅពេលដែលយើងយល់ច្បាស់ពីដំណឹងល្អតាមព្រះគម្ពីរ នោះវានឹងមានឥទ្ធិពលលើគ្រប់ទាំងសេចក្តីអធិប្បាយ គ្រប់ទាំងសកម្មភាពនៃពិធីបុណ្យជ្រមុជទឹក និងពិធីលៀងព្រះអម្ចាស់ គ្រប់ទាំងបទចម្រៀង គ្រប់ទាំងសេចក្តីអធិស្ឋាន និងគ្រប់ទាំងការសន្ទនារបស់យើង។ ពួកជំនុំដែលមានសុខភាពល្អនឹងអធិស្ឋាន ហើយចង់ស្គាល់ដំណឹងល្អនោះឲ្យកាន់តែស៊ីជម្រៅលើសជាងអ្វីៗទាំងអស់។
ហេតុអ្វីបានជាដូច្នោះ? ពីព្រោះសង្ឃឹមនៃដំណឹងល្អជាសង្ឃឹមនៃការស្គាល់សិរីល្អរបស់ព្រះជាម្ចាស់ដែលភ្លឺចាំងពីព្រះភក្ត្រព្រះគ្រីស្ទ (២កូរិនថូស ៤:៤-៦)។ សង្ឃឹមនៃដំណឹងល្អជាសង្ឃឹមនៃការមើលទ្រង់ឃើញយ៉ាងជាក់ច្បាស់ ហើយស្គាល់ទ្រង់ ដូចជាទ្រង់ស្គាល់យើងយ៉ាងជាក់ច្បាស់ដែរ (១កូរិនថូស ១៣:១២)។ សង្ឃឹមនៃដំណឹងល្អជាសង្ឃឹមដែលយើងនឹងបានដូចជាទ្រង់ ដ្បិតដែលទ្រង់យ៉ាងណា នោះយើងនឹងឃើញទ្រង់យ៉ាងនោះដែរ (១យ៉ូហាន ៣:២)។
ចំណុចស្នូលនៃដំណឹងល្អ
ដំណឹងល្អមិនមែនជាដំណឹងដែលប្រាប់ថា យើងអត់មានបញ្ហាអ្វីនោះទេ។ វាមិនមែនជាដំណឹងដែលថា ព្រះជាម្ចាស់ជាសេចក្តីស្រឡាញ់ ហើយវាក៏មិនមែនជាដំណឹងដែលថា ព្រះយេស៊ូវសព្វព្រះទ័យនឹងធ្វើជាមិត្តសម្លាញ់យើងនោះដែរ។ វាមិនមែនជាដំណឹងដែលថា ទ្រង់មានផែនការដ៏អស្ចារ្យសម្រាប់ជីវិតរបស់យើងនោះទេ។ ប៉ុន្តែដំណឹងល្អ គឺជាដំណឹងដែលថា ព្រះយេស៊ូវគ្រីស្ទបានសុគតនៅលើឈើឆ្កាងទុកជាយញ្ញបូជាជំនួសមនុស្សមានបាប ហើយទ្រង់បានរស់ពីសុគតឡើងវិញដែលបានបើកផ្លូវឲ្យយើងបានជាមេត្រីនឹងព្រះជាម្ចាស់ឡើងវិញ។ វាជាដំណឹងដែលថា ព្រះដ៏ជាចៅក្រមដែលនឹងជំនុំជម្រះមនុស្សលោក នឹងត្រឡប់ជាព្រះវរបិតាដែលយើងអាចមានទំនាក់ទំនងនឹងទ្រង់បាន ប្រសិនបើយើងប្រែចិត្ត ហើយទទួលជឿលើទ្រង់ (បើចង់យល់ឲ្យបានលម្អិត សូមមើលជំពូក១)។
មានចំណុចបួនយ៉ាងដែលខ្ញុំព្យាយាមចងចាំ នៅពេលណាដែលខ្ញុំផ្សាយដំណឹងល្អ មិនថាផ្សាយនៅកន្លែងឯកជន ឬនៅទីសាធារណៈក្ដី។ ចំណុចទាំងនោះគឺ (១) ព្រះជាម្ចាស់ (២) មនុស្ស (៣) ព្រះគ្រីស្ទ និង (៤) ការឆ្លើយតប។ ឬម្យ៉ាងទៀត ខ្ញុំសួរ
ខ្លួនឯងថា៖
ពេលខ្លះ យើងចង់ប្រកាសតែពីអត្ថប្រយោជន៍ដ៏ពិតតែមួយចំនួននៃដំណឹងល្អ ជាជាងប្រកាសពីដំណឹងល្អទាំងមូល។ ហើយអត្ថប្រយោជន៍ទាំងនោះ ទំនងជាអ្វីដែលអ្នកមិនជឿតែងតែប្រាថ្នាចង់បានដូចជា អំណរ សុភមង្គល ភាពស្កប់ចិត្ត ការឲ្យតម្លៃលើខ្លួនឯង ឬសេចក្តីស្រឡាញ់។ ប៉ុន្តែ ការដែលយើងចែកចាយពីអត្ថប្រយោជន៍ទាំងនេះឡើងថាជាដំណឹងល្អ នោះមានន័យថា យើងចែកចាយតែផ្នែកខ្លះនៃសេចក្ដីពិតតែប៉ុណ្ណោះ។ លោក ជេ. អាយ. ផាកឃើរ (J. I. Packer) បានលើកឡើងថា «សេចក្ដីពិតតែពាក់កណ្តាល គឺមិនមែនជាសេចក្តីពិតនោះទេ តែជាការកុហកទៅវិញ»។១
តាមពិត យើងមិនមែនគ្រាន់តែត្រូវការអំណរ មេត្រីភាព ឬគោលដៅនៃជីវិតតែប៉ុណ្ណោះទេ គឺយើងត្រូវការព្រះជាម្ចាស់ផ្ទាល់។ ដោយសារយើងជាមនុស្សមានបាបដែលត្រូវទទួលការជំនុំជម្រះពីព្រះជាម្ចាស់ នោះយើងពិតជាត្រូវការការអត់ទោសពីទ្រង់លើសជាងអ្វីៗទាំងអស់ទៅទៀត។ យើងត្រូវការជីវិតខាងឯវិញ្ញាណ។ នៅពេលដែលយើងប្រកាសដំណឹងល្អមិនបានគ្រប់ជ្រុងជ្រោយទេ នោះយើងគ្រាន់តែសុំឲ្យមានអ្នកជឿក្លែងក្លាយ និងតារាងបញ្ជីឈ្មោះសមាជិកពួកជំនុំច្រើនឥតន័យប៉ុណ្ណោះ។ ទាំងអ្នកជឿក្លែងក្លាយ ទាំងបញ្ជីឈ្មោះសមាជិកដ៏ច្រើនឥតន័យនេះ ធ្វើឲ្យការប្រកាសដំណឹងល្អដល់លោកីយ៍ជុំវិញយើងកាន់តែពិបាកឡើងៗ។
ការហៀរហូរនៃដំណឹងល្អ
នៅពេលដែលពួកជំនុំមួយមានសុខភាពល្អ ហើយសមាជិកពួកជំនុំនោះស្គាល់ ហើយស្រឡាញ់ដំណឹងល្អលើសអ្វីៗផ្សេងទៀត នោះពួកគេនឹងកាន់តែចង់ផ្សាយដំណឹងល្អនោះដល់លោកីយ៍។ លោក ចច ដាប់បលយូ. ទ្រូអេត (George W. Truett) ដែលជាអ្នកដឹកនាំគ្រីស្ទបរិស័ទដ៏អស្ចារ្យម្នាក់នៅជំនាន់មុន ហើយជាគ្រូគង្វាលនៅពួកជំនុំហ្វើសត៍បាប់ទីស្ទ (First Baptist Church) នៅក្រុងដាឡាស់ (Dallas) ក្នុងរដ្ឋតិចសាស់ (Texas) នៃសហរដ្ឋអាមេរិកបានលើកឡើងថា៖
ការចោទប្រកាន់ដ៏ធំបំផុតដែលអ្នកអាចយកមកទាស់ប្រឆាំងនឹងពួកជំនុំមួយ...គឺថា ពួកជំនុំបែបនោះខ្វះនូវចិត្តឆេះឆួល និងសេចក្តីក្ដួលអាណិតដល់ព្រលឹងមនុស្សដែលបាត់បង់។ ពួកជំនុំគឺគ្មានអ្វីល្អប្រសើរជាងក្រុមមួយដែលបង្រៀនពីសីលធម៌នោះទេ ប្រសិនបើសេចក្តីក្ដួលអាណិតរបស់ពួកគេចំពោះព្រលឹងដែលបាត់បង់មិនមានភាពខ្លាំងក្លា ហើយប្រសិនបើពួកគេមិនចេញទៅ ដើម្បីប្រកាសពីផ្លូវនៃសេចក្តីសង្គ្រោះរបស់ព្រះយេស៊ូវគ្រីស្ទដល់ព្រលឹងដែលបាត់បង់ទេនោះ។២
សព្វថ្ងៃនេះ សមាជិកនៃពួកជំនុំរបស់យើងចំណាយពេលជាមួយនឹងអ្នកមិនជឿនៅក្នុងផ្ទះរបស់ពួកគេ នៅការិយាល័យរបស់ពួកគេ និងនៅផ្ទះអ្នកជិតខាងពួកគេច្រើនជាងការដែលពួកគេចំណាយពេលជាមួយនឹងគ្រីស្ទបរិស័ទដទៃទៀតនៅរៀងរាល់ថ្ងៃអាទិត្យទៅទៀត។ ធម្មតា ការផ្សាយដំណឹងល្អមិនមែនជាការដែលយើងអញ្ជើញនរណាម្នាក់មកព្រះវិហារនោះទេ។ យើងម្នាក់ៗមានដំណឹងដ៏អស្ចារ្យពីសេចក្តីសង្គ្រោះនៅក្នុងព្រះគ្រីស្ទ។ ចូរយើងកុំដូរដំណឹងល្អនេះជាមួយនឹងអ្វីផ្សេងទៀតឡើយ។ នៅថ្ងៃនេះ សូមចែកចាយពីដំណឹងល្អទៅ!
ពួកជំនុំដែលមានសុខភាពល្អស្គាល់ដំណឹងល្អ ហើយក៏ចែកចាយពីដំណឹងល្អនោះ។
១. ដកស្រង់ពី «សេចក្តីផ្ដើម» នៃសៀវភៅ The Death of Death in the Death of Christ (Edinburgh: Banner of Truth, ១៩៥៩, បោះពុម្ពលើកទី២ ឆ្នាំ១៩៨៣), ទំព័រ២។
២. លោក George W. Truett, A Quest for Souls (New York: Harper & Brothers, ឆ្នាំ១៩១៧), ទំព័រ៦៧។
គំនិតជំនួយខ្លះៗ៖
របៀបស្វែងរកពួកជំនុំមួយដែលល្អ
១. សូមអធិស្ឋាន។
២. សូមប្រឹក្សាយោបល់ពីគ្រូគង្វាលដែលកោតខ្លាចព្រះជាម្ចាស់ ឬពីពួកចាស់ទុំ។
៣. សូមរក្សាអាទិភាពរបស់លោកអ្នកឲ្យត្រឹមត្រូវតាមព្រះគម្ពីរ។
៤. សូមសួរខ្លួនឯងនូវសំណួរបែបវិភាគដូចជា៖
៥. សូមគិតទៅលើទីតាំងនៃពួកជំនុំ។ តើចម្ងាយពីផ្ទះរបស់លោកអ្នកទៅកាន់ពួកជំនុំដែលលោកអ្នកត្រូវជិះទៅមកជាញឹកញាប់ ដើម្បីចូលរួមកម្មវិធីផ្សេងៗនោះ ធ្វើឲ្យលោកអ្នកបាក់ទឹកចិត្តលែងចង់ទៅទៀត ឬក៏លោកអ្នកពេញចិត្តនឹងទៅទៀត? ប្រសិនបើលោកអ្នកផ្លាស់ទីលំនៅទៅកន្លែងថ្មី នោះចូរព្យាយាមកំណត់រកទីតាំងពួកជំនុំមួយដែលល្អជាមុនសិន មុនពេលលោកអ្នកទិញ ឬជួលផ្ទះ។